SA FÈMINA

Pro su chi pertocat su bestire de sas fèminas cheret chi movamus dae sa documentatzione intre su 1600 e su 1700. A su chi narant sas cartas notariles de su 700 issu contaiaT unos cantos pìngios. Comintzende dae una cùfia de seda (sa CARETA) posta in conca cugutzende sos pilos cun randas indeoradas e impratadas importadas dae Frantza, ma finas prus simpre de tela fine o de pannu. In dossu b’amus sa CAMIJA, una camisa longa meda chi lompiat a cambutzos fata de tela (traballada in su telàrgiu) e ricamada in sa tzugrera, in sos burtzos e in su prefàlliu. Posca su GROPITU, cun roba de importatzione e ruju in prevalèntzia. Particulare s’IMBUSTU, cun duas partes aunidas dae duos nastros de rasu, a parusu fatu cun tessutu damascadu (o cun unu brocadu birde connotu comente “s’istofa de Gènova”), cun griseta, seda, rasu e ispolinu.
Su ‘ELU fiat imbetzes tìpicu de sas fèminas obligadas a si cuare sa cara in foras de domo issoro e mescamente in Crèsia (in ue lu cheriant prus mannu), fatu cun grandu abilidade e cun materiales diferentes comente sa tela de ampua, sa prus rafinada tela de butega, ma fintzas seda, linu e mussolina. Sa CAPITA est sa parte de su bestire osilesu sa prus connota e apretziada fintzas pro sos ricamos suos. Pro seguru eredada dae sos ispagnolos, est una mantella non manna meda fata de saja ruja o bianca (mancari si faeddet fintzas de capitas damascadas, pannu grogu e rasceta). Si narat fintzas chi s’antepassada de sa capita fiat sa cobeltedda impreada cada die dae sas populanas; fiat a forma de mesuluna (sa ‘olta) e pinnigada in conca pro formare un’arcu ampru cun oros asulos. Oe est de rasu e tertziupelu tanadu e ruju cun una fàscia larga ricamada in filu de seda cun frores de rosa. Mentovada cheret finas sa FALDETA, unu tempus mutida finamentas sutana, baldagore o faldeghinu. Sa parte de dae in antis est allorigada in chintzu e sa de in segus, pinnigada a fine, est ruja a parusu mancari si connoscat fintzas sa faldeta lilla e su baldagore de cadissu biaitu.
Sa roba impreada cumbinat cun sas ocasiones: pro cada die materiales pagu rafinados comente sa mesa saja e su cadissu in lana; pro sas dies nòdidas rasceta, damascu, pannu e furesi. Cumpletaiat sa bestimenta feminile unu grembiale, su PANNEDDU; incrispadu in chintzu e cun roba de vària casta, lu poniant subra de sa gunnedda e fiat parte essentziale de su bestire osilesu. Butones giai mentovados a banda (22 pro duos bratzos), àteru cheret naradu in contu de prendas. Su zinchìgliu est una cadena de oro e filigrana longa finas a petorras cun unu portafoto in oro in parte covecadu dae su belu e un’agùgia de oro in conca pro firmare sa capita. Faeddende de su noighentos, sas fèminas de Òsile non possediant una casta de bestire ebbia ma una sèrie intrea: su ‘estire de cheja o de gala (pro sas dies nòdidas); sa capita niedda (semper de gala ma de pannu nieddu); sas faldetas covacadas (pro sas biudas ma fintzas pro sas giòvanas pòberas in die de isposòngiu): sas faldetas in conca o de passizu o a cuguditu (una conca a susu a ghisa de cugutzu); su mucaloru ispaltu (impreadu dae sas fèminas subra su belu); su bestire de ogni die (cun su tempus una camisa prus dèghida, s’isjaca, leat su logu de gropitu, imbustu e belu); su bestire de cunfidèntzia o in panneddu (pro sas essidas profanas de sas fèminas prus pagu ricas).