s’òmine

Diferentes sunt sos elementos de su bestire de sos òmines, cada unu cun una istòria sua e cun un’evolutzione chi meresset analizu prus chi no atentu. Sa BERRITA, niedda e longa intre sos 50 e sos 60 tzentìmetros, nche falat a runcos de coddu cun sos oros aturundados privos de cosidura laterale (si no in sa parte chi si serrat). «Cando est noa – iscriiat su canònigu Liperi-Tolu – est trapuntada cun granigheddos o frochitos de lana chi naschent dae su pannu gràtzias a sa manu infusta de sa fèmina chi, protzedende a chircu cun sa roba in ghenugros, nde li bogat sa burra». Sas berritas non fiant aprontadas in Òsile, ma petzi traballadas dae sas fèminas a pustis de las àere comporadas. Cunforma a sos contos de sos mannos, nânt chi custa berritas las impreaiant òmines de Caragnani conca a sas cussòrgias de su tataresu cuende·bi in intro su dinare. E chi pro custu – semper cunforma a su contu – b’aiat pitzocos chi, pro lis pigare sos rispàrmios, chircaiant de bi nche las tòddere de cada manera.
Su ‘ENTONE, prus russu pro cada die e pro su traballu e prus pagu russu pro sas dies nòdidas, fiat una camisa de linu naturale cun collete pinnigadu, trapuntadu a fine e serradu cun unu butoneddu de filu de linu retortu (bator butones de oro filigranados che a sos de sa fèmina, in s’otighentos e posca isparèssidos). Abertu in petorras, teniat mànigas ampras cun burtzos serrados pro mèdiu de butoneddos che a su de su collete. Su CAPOTINU, de furesi, nieddu, cun cugutzu cònicu e fatu dende·li grandu cuidadu, est abertu in dae in antis, rivestidu de belludu in intro e tenet duas butzacas mannas in ambos duos sos lados comunichende a palas. Cada istajone fiat sa sua ca andaiat bene contra a su fritu e contra a su caldu. In sa metade de su setighentos li naraiant longarina ca covecaiat parte de s’anca. Sunt sos atos notariles chi cunfirmant sa presèntzia de custu capotu in Òsile.
A su CAPOTONE, nieddu, semper de furesi e cun unu cugutzu semper cònicu ma largu e de pannu in intro, li naraiant fintzas cabbanu. Longu fintzas a cambutzos, fiant abertu a dae in segus bene sestadu pro sètzere a caddu. Unu cordone in colore de su capoto matessi lu serraiat a dae in antis. Sos CARTZONES, arbos, largos e astrintos in chintzu cun frisetas in antis e elàsticos a pustis, fiant cun sas estremidades lìberas finas a cando non las serreint in intro de sas ghetas. In antis de colare a sa tela, a su linu o a su bambaghe, fintzas issos fiant de furesi. Sas RAGAS: nieddas e de furesi, custu est su nùmene de una fardeta pinnigada a fine in chintzu e bestida subra sos cartzones. Una retranca in mesu de ancas aunit sas estremidades. Nieddas e de furesi, sas CARTZAS covecant sas ancas – amparende·las traballende peri sos sartos – dae su pische finas a sas botas. A comintzu de su noighentos, in càmbiu de sas cartzas comintzeint a si pònnere cambales de còrgiu e ghetas de pedde. Àteros duos elementos de su bestire de s’òmine chi non s’agatant prus sunt sa MASTRUCA (un’ispètzia de capoto cun bator peddes de berbeghe galu non tusa) e su COLLETU (unu gabbanu longu de còrgiu privu de mànigas, trapuntadu in rasu e presu in chintzu pro mèdiu de una chintòrgia).