SA FÈMINA

In prus de sa BENNA giai mentovada, de linu o de cotone (posta a parusu dae sas fèminas mannas e chi unas cantas fontes iconogràficas nde mustrant s’impreu dae parte de sas bajanas in carchi ocasione tzerimoniale), movende dae conca b’amus finamentas su MUCADORE, chi galu oe si lu ponent sas betzas a fitianu, e s’ISCIALLETO pro sas dies de festa e pro sas tzerimònias. Custos ùrtimos duos fiant de seda, oe de rasu. De cada manera, benda, mucadore o isciallu, bi cheriat un’acontzadura dèghida cun cherbeddos lìberos e pilos collidos in gatzile cun su CUCHETO, un’ispètzia de cucale.
In dossu b’est sa LINZA, tèrmine chi agatamus finamentas in Bitzi, Lùvula e Lollobe a su chi nos narat Max Leopold Wagner in contu de camisa. De tela bianca pro intreu, est unu pìngiu de grandu importu in su vestiàriu populare. Ampras sunt sas mànigas suas cun unas cantas incrispaduras cuadas o cun ricamos geomètricos (unu coro cun puntos meda). In burtzos b’at unas cantas bagas serradas cun butone simpres de plàstica o de matribella. Posca b’amus sa CAMISSOLA (sutana bianca de cotone e a parusu longa finas a ghenugros; sena mànigas e cun ricamu lughente a puntu tela o festone postu de dae in antis) e sas PETORREDDAS (semper de cotone biancu, presas in palas, pinnigadas in petorras, ricamadas a coros, ondradas cun butones de oro e cun su gremmallu, su fermàlliu de oro).
Su CÀSCIU, imbetzes, tenet sa forma de unu corpete astrintu a su bustu: su pannu impreadu est de colore grogu-arantzu, ondradu de belludu operadu (tritziupilu) de colores diferentes (birde, biaitu, tanadu) e imbellidu dae sas àvas e dae sas pandereddas: sas primas mesu lunas minores prenadas cun filos colorados; sas àteras belle a formare unu triutzu. Su càsciu tenet un’istrutura belle tètera, serradu cun gantzitos suta de su sinu, e abarrat astrintu pro chi si sebestent sas formas de sa fèmina. Posca su CORITU, cun forma de giponeddu e cun pannu ruju (sa grana), est abertu de dae in antis e nche falat finas a chintzu. Fintzas issu est ondradu de avas, pandereddas, cordoneto, zingu (rifinidura de rasu birde cun repuntas grogas).
In contu de GUNNEDDAS b’amus sa ’E SUTA (de cotone biancu cun unu ricamu minore a intàlliu chi cumpletaiat s’ala estrema), sa CUN SA GRANA (cun prefàlliu de pannu ruju e arrichida cun sas vetas). In custa su prefàlliu inferiore est de pannu ruju rifinidu cun repuntas de filu birde. Tenet duas butzacas mannas laterales, sas màsculas, ma non sunt rifinidas. Sa gunnedda A DUAS o A UNA CASTA DE TRITZIUPILU (cun duos o unu prefàlliu) est de pannu nieddu, a pìnnigas in sa parte de segus francu in mesu. Sa parte de subra chi fascat sos cùmeros, s’INTENTA, est tètera e rivestida de belludu operadu e de fascas minores de brocadeddu. Mannu est su prefàlliu de belludu operadu ma a bias bi nde podiat àere duos cunforma a sa classe sotziale. S’ARDETA, in fines, est unu grembiale de rasu nieddu ricamadu a fine cun motivos froreali. Si la poniant pro sas dies de festa; cada die, imbetzes, su grembiale simpre, de seda o rasu, chi podiat èssere castàngiu, bordeaux o nieddu.