s’òmine

Su vestiàriu maschile presentat pagu prus o mancu sos matessi caràteres in sas localidades diferentes de s’ìsula nostra. Sa BERRITA, pro nàrrere, de pannu, niedda, a forma de tubu, est longa belle 50-70 tzentìmetros e l’agatamus in grandu parte de Sardigna cun sa punta ruende a dae in segus de su gatzile o a unu chirru ma finamentas pinnigada in cùcuru. In dossu b’agatamus sa CAMISSA chi, che a sa de sas fèminas, est fintzas issa de cotone biancu e faghet parte de sa bestimenta ìntima. Su collete e sos burtzos sunt ondrados de coros, motivos geomètricos fatos tessende filu nieddu intre sas tramas de su cotone biancu; b’est fintzas su brunnimentu, traballu de su cotone a puntu tela o randa antiga.
A su collete, dritu e bastante artu, lu serrant sos butones in filigrana de oro. S’istrutura sua est simpre meda. Issa resurtat semper ampra meda e s’impreu suo non cajonat variatzione peruna in su modellu. Su SOLOPADU, imbetzes, est su corpete de pannu ruju sàmbene de boe, rivestidu in dae in antis de belludu biaitu note cun s’iscolladura bordada de belludu bordeaux e rifinidu dae su cordoneto, cordonitu fatu a manu cun filos colorados e, carchi borta, mescamente pro sos pitzinneddos, arrichidu cun sas avas. A banda de segus, comente pro su càsciu, su coritu femminile, b’at aplicatziones de belludu belle a formare unu disegnu a forma de ispiga. In costàgios e in tretos de su coddu lu serrant sos gantzitos. Su GABBANU DE ORESSI est nieddu, longu finas a metade de cossa, cun duas butzacas ampras e rifinidas cun randas nieddas. Cun cugutzu sagumadu podiat èssere a petorra dòpia o simpre. Peruna fòdera in intro e peruna abbutonadura b’at. In contu de pantalones b’amus sos CARTZONES de furesi nieddu, agghirionados in chintzu e orulados cun belludu nieddu fintzas in sas butzacas laterales.
Sa LETRANCA, una camba de tessutu, auniat sas alas de dae in antis e de dae in segus colende·nche suta su caddu de sas cossas. Sos CARTZONES DE TELA, imbetzes, sunt biancos e longos finas a sa metade de su pische de s’anca e nch’intraiant in sas MESSU CARTZAS, sas ghetas. Custas sunt de furesi, rifinidas cun belludu de su matessi colore e cun ricamos lèbios, a s’ispissu fatos a màchina; sunt elementu indispensàbile de sa bestimenta maschile e una bia postas sighint sa forma de sa sabata e resurtant aturundadas subra su coddu de su pee. Sunt bene sagumadas e movent dae suta su ghenugru, in ue b’at unu presòrgiu, finas a cambutzos. Cherent ammentados finamentas sos esemplares in còrgiu, sos CAMBALES, a s’ispissu serrados cun una sèrie de butones, àteras bias cun latzos. Si los poniant cun pantalones a s’isporta, ampros subra sas cossas e aderentes subra sas ancas. Àteru mentovu meresset su CHINTORJU: custa tzintura est un’atzessòriu importante de sa bestimenta maschile. De còrgiu, a s’ispissu naturale o a bias tinta a nieddu, a parusu est foderada de seda o de rasu e s’ispissu ricamada cun motivos froreales e orulada cun pedde ruja. Sa longària mudat cunforma a chie la devet bestire.