Si est beru chi sas bestimentas faeddant, contende·nos una comunidade cunforma a chie si poniat ite, est beru chi faeddant finamentas sos ammànios criadores de sos pìngios chi a cussa comunidade la caraterizant galu oe. Diat èssere bastante a mentovare su lionzu, tèssidu gràtzias a unu bermesìrigu introduidu a concruos de su ‘700 cun sa lòmpida de sos gesuitas a Ulìana e allevadu in pare cun su contivìgiu de sa murichessa. A su presente in Orgòsolo b’at un’allevamentu ebbia de custu berme, de custu ‘ermeddu chi naschet pagu prus o mancu su 25 de abrile, die de Santu Marcu (si contat chi in antis sas fèminas si nche poniant sos oigheddos in sas petorras tèbias andende a professone, conca a sa crèsia in su sartu de bidda). Postos a pustis in intro de casseteddas de sa frùtora in un’aposentu intre sos prus pagu fritos de domo, los covecaiant de fògias de murihessa pro lis dare alimentu. Posca, una borta formada sa cocheta de seda, partzidos unos cantos mascros e fèminas pro sa riprodutzione de s’annu a pustis e faghende mòrrere su cagaragasu (in furru fritu o in congeladore) pro non pertùnghere sa cocheta matessi e truncare gasi sa continuidade de su filu, si protzedet cun su traballu. Sas cochetas postas in un’istèrgiu prenu de abba ingrispande·si (buddende) sunt giradas cun s’iscopita pro formare sa madassa collida a pustis pro mèdiu de una canna a forma de rughe, sa naspa. Bogada sa sèdina cun s’abba frita s’otenet su filu dae sa trama pro mèdiu de su chìndalu (su lhingaru) e de su fusu (‘usu) pro otènnere su filu dae sa trama. Su colore de su lionzu, in fines, bi l’amus cun s’impreu de su tzaferanu. E si dìliga est custa protzedura, impinnu mannu bi cheret finamentas in s’aghirionadura de sas gunneddas, faina chi li narant tènnere sos sahitos o tènnere sa veste. Cada pìnniga est cosida a manu cun s’agu chi colat in sa roba infusta in abba caente. Postu su pìngiu a assutare suta sas àrbores de pira pro belle unu mese, sas pìnnigas abarrant fintzas a pustis de s’iscosidura.