SA FÈMINA

Sa CARETA est sa cùfia in brocadu posta subra sos pilos (collidos a mesu luna o, longos, partzidos a duas alas cun tritzas chi formant unu oto) e presa suta su baeddu. Pro su corrutu sa careta de sa viuda est tinta a nieddu. Su LIONZU giai mentovadu est su cugutu de sa fèmina cojuada cun forma e tràgiu de màdrighe medievale; una benda retangulare longa 160 tzentìmetros cun 31 de largària (cun mesu tzentìmetru de tzimusa pro cada ladus, fata cun filos de seda nieddos, rujos, birdes e asulos colore ‘e aera). Tèteru e dìligu, non cheret sabunadu: sas orgolesas, difatis, non ponent trucu perunu e atentu mannu dant a su suore pro chi non si mantzet sa benda. Su de sas viudas est tintu a nieddu. Pro sas chi non sunt cojuadas b’est su CUGUTU DE SA BAJANA, isciallu de tibet cun pinturas chi si podet pònnere serradu comente su mucadore triangulare (panniheddu) o abertu. De sa HAMISA, longa finas a chintzu e fata de trambichi (cotone fine meda), bi nd’at duas castas cunforma a sa decoratzione.
De s’impreu de su CORPETE de tela bianca, postu sena mànigas suta de sas camisas, si nde faeddat dae sos primos annos de su noighentos. Duos sos tipos de abertura: in dae segus (a mesu tzugru) e in costàgios (cun bagas rifinidas a manu e butoneddos de matribella). Su ZIPONE est una giancheta de pannu ruju brillante aberta de dae in antis. Est ricamadu mescamente in sas mànigas, chi sunt fatas cun duos triàngulos de pannu aunidas in sa parte de suta. Movende dae su burtzu bidimus sa presèntzia de su rasu biaitu, s’òrulu, chi rivestit sa màniga intrea. Subra de su rasu biaitu si formant unas cantas figuras geomètricos belle romboidales. Diferentes sunt sos motivos e sos colores de custu pìngiu; gasi etotu sas tècnicas de ricamu comente su puntu de cadena e su puntu hurdone. Sas PALAS sunt unu tipu de bustinu chi, postas dae s’isposa ma finas dae sa bajana, caraterizant da bidda de Orgòsolo. Est unu coritu, presu de dae in antis in bassu cun unu nastru de seda, de pònnere semper subra de su zipone. Pro lu cosire impreant seda niedda e belludu de seda e, pro l’abbellire, li ponent in rilievu pinturas a ghisa de frores.
Intestazione Slide
Lorem ipsum dolor sit amet, consectetur adipiscing elit. Ut elit tellus, luctus nec ullamcorper mattis, pulvinar dapibus leo.
Clicca qui
Presentes finamentas bator triàngulos de belludu a frores chi, aunidos, formant unu retàngulu mannu rifinidu cun partes geomètricas de seda niedda. Cunforma a sos disegnos b’amus sas palas de s’àrvore mannu, sas palas de su cravellu, sas palas de su ziru o de sas rodeddas. De gunneddas bi nd’amus tres. Sa VESTE, s’ùnica chi bidimus, est sa prus curtza. A su presente la faghent de pannu de lana biaita-birde iscuru ma in antis la faghiant de lana de angione e li naraiant sa harrassa. Sas àteras duas sunt sos SAHITOS chi, ambos de furesi in colore de ruìngiu e postos suta de sa veste, si diferèntziant petzi pro su colore de su prefàlliu. Cunforma a su rasu b’amus su sahitu rùviu e su sahitu virde. In fines b’abus su SAHITEDDU, fardetedda de tela de cotone biancu longa fintzas a cambutzos, e s’ANTALENA, grembiale chi cumponet sa bestimenta de sa fèmina cojuada e chi est unu gosu de colores e de ricamos.