s’òmine

Sa beste de s’òmine orgolesu presentat ricamos e tessutos comunos a sa de sas fèminas. Fintzas inoghe b’at diferèntzias cunforma a s’istadu tzivile: pro custu est chi b’amus su costùmene de viudu e àteras castas de bestes. Unu pìngiu caraterìsticu fiat su de sas PEDDES. Fiat; ca in cussa parte de tempus a caddu intre sos concruos de sos annos ‘70 e su comintzu de su deghènniu a pustis nche las pongeint a banda, forsis pro sa mancàntzia de maistros e de maistras de pannu chi, cun sabidoria artesana, las cosiant.
A su presente, difatis, podimus bìdere chi in sas professones nen sos òmines a caddu nen sos chi andant a pee las bestint. Ma beru est chi custas peddes las podimus sebestare, prus chi non documentadas, in sos retratos chi non mancant in sas domos de sa bidda. Gasi etotu bundant sos contos de sos mannos. Postu a banda finamentas su GABBANU DE ‘URESI impreadu in sos annos de sa Grandu gherra. Difatis, cando sos sordados torraiant dae su fronte, sas divisas issoro de tando aiant dadu ideas noas a sas mastras chi, de custa manera, comintzeint a cosire capotos de furesi pretzisos a sos de pannu bestidos dae sos militares. Un’àteru pìngiu parte de sa bestimenta maschile, mescamente de sos pastores, est su SAHU DE ‘URESI, unu manteddu mannu de furesi cun cugutzu a punta postu subra su hostùmene in ierru pro covecare s’òmine e pro èssere impreadu, a de note dormende suta sos isteddos e a curtzu a sa roba, comente coberta. In contu de gipones podimus nàrrere chi finas a sos annos ‘70 de su ‘900 su tipu de beste sa prus posta fiat su ZIPONE TANCAU.
Abbaidende·lu bene bene bidimus un’ispètzia de giacheta de furesi cugugende sos coddos, sos bratzos e sa parte arta de sas petorras. Su furesi est cosidu subra de sa giacheta de pannu ruju, chi est aberta de dae in antis e agigu iscollada. Totu sa parte de mesu, de suta e de palas, est ricamada cun filos de seda e custos ricamos geomètricos a trapètziu e a triàngulu nos ammentant sos de su costùmene de sa fèmina. Su ZIPONE APERTU fiat pagu postu a comintzu; posca fiat de impreu comunu mescamente intre sos giòvanos in dies de festa. Sa diferèntzia cun sa casta prus antiga est in sas mànigas ebbia pro more de duos triàngulos mannos de pannu; custas sunt abertas in intro e dae cue essint sas de sa camisa. Cada màniga est ricamada in foras sighende sos matessi ricamos geomètricos de sas petorras.
Sos àteros pìngios de su costùmene sunt che pare: siat su chi est a sa moda antiga, siat su chi est a sa moda de como. Amus duncas sa BERRITA de pannu nieddu, sa CAMISA de tela bianca ricamada a fine in su collete e in burtzos cun ricamos in cotone e su horo fatu a manu, sa FRAHA de uresi nieddu, aghirionada a s’artària de sa chintòrgia. Posca amus sos CARTZONES chi podimus nàrrere chi sunt comente duas bragas longas de tela de cotone bianca e chi nche falant a suta de su ghenugru: suta sos cartzones agatamus sas HARTAS, duas ghetas de furesi nieddas astrintas in purpatzos e chi covecant parte de sas botas.