s’òmine

Pro su chi pertocat sa bestimenta maschile est de importu a si sapire de sas pagas diferèntzias sustantziales e de istrutura intre sos pìngios festivos e de gala e sos fitianos. B’at de nàrrere finamentas chi sa bestimenta maschile at connotu un’evolutzione prus pagu meda marcada de sa de sas fèminas: su chi currispondet a su “costùmene” est riferidu a sos tràgios de sa segunda metade de s’800. Sa BERRITA, chi ruiat in palas in cuntestos de gala, in Nùgoro «est unu pagu prus longa de sa de sos àteras biddas». Su GHENTONE, imbetzes, «nche falaiat unu pagu prus suta de su chintzu». Custas camisas fiant «abertas de su totu in dae in antis»; su collete issoro, cun bagas e butones de oro o de prata, fiat «sa parte sa prus importante de sa camisa» cun prus «de unu mese a los trapuntare».
Su ZIPONE «est iscarlatu. Sa parte de dae in antis e sas mànigas sunt foderadas cun belludu turchinu grussu e iscurigosu». Mancari produidu a parusu in belludu de cotone, bi nd’aiat fintzas in belludu de seda, cun deghe travos ricamados in asulu in sos pìngios prus ricos. Pìngiu cun duas caras, dae sa segunda metade de s’otighentos si impreat ebbia sa parte de subra cun su belludu in esternu. Subra de su zipone fiat de impreu comunu, in foras de su cuntestu domèsticu, su de si pònnere àteru. «A su nugoresu, istiu o ierru, no li mancat mai su CAPOTU, de albache nieddu cun sas fardas foderadas de belludu nieddu e trapuntadas, curtzu, cun su cugutzu elegante meda». Àteros bestiant «sas PEDDES, nieddas, beste primitiva chi galu la mutint mastruca, mancari chi custu nùmene non s’agatet in sos vocabulàrios italianos». «Sos artistas, est a nàrrere sos artigianos e sos pitzinnos, imbetzes de capotu e peddes bestiant giacas, semper sena mànigas, de astrakan farsu», s’ISTRACANU. Su SACU, imbetzes, manteddu de furesi nieddu, fiat petzi impreadu in cuntestos fitianos e de traballu pro s’amparare dae su tempus malu.
Sos CARTZONES DE FURESI in Nùgoro sunt semper nieddos, cun sas ispunzas in chintzu. «Custos cartzones arribbant pagu prus o mancu a unu parmu suta de su chintzu. Sunt a volante, orulados agigu dae unu filu de iscarlatu». Sa longària de su capu est proportzionale a s’edade de s’òmine, difatis sos giòvanos bestint a parusu cartzones meda prus curtzos cunforma a sos de sos mannos. Sos CARTZONES DE TELA, imbetzes «sunt biancos, grussos e largos, e los incrispant subra de ghenugros e nche los intrant in sas mesas cartzas de albache, firmadas cun presòrgios de còrgiu connotos comente “filos a cambas”». Impreu comunu fiat su de bestire sos cartzones de tela intro de sas MESAS CARTZAS atilladas e oruladas a ruju, mancari sos pitzinnos e sos istudiantes fiant costumaiant a nche los lassare in foras. In chintzu b’est sa CHINTORJA, de còrgiu nieddu, cun filos polìcromos de seta e crobada a sa BENTRERA (unu marsùpiu) pro sas festas. In contu de cartzaduras «sas BOTAS sunt ferradas, fortes meda, ma chie podet bestit fintzas SABATAS fines».