Ceràxius

In contu de bestimentas traditzionales ceraxinas (e de sas biddas in tretos de Casteddu), sas connoschèntzias pertocant sas fontes iscritas e iconogràficas chi movent dae sa metade de su de 18 sèculos in susu. Totu custu nos permitit de pòdere analizare s’evolutzione de sos bestires in su sèculu intreu a pustis pro mèdiu de s’istùdiu de custas fontes, de sos documentos de archìviu e de s’istùdiu de sas bestes cròmpidas finas a nois. Su bestire de gala, gasi comente totu sas àteras variantes determinadas dae sos grupos sotziales e dae sas possibilidades econòmicas, est andadu a dae in antis sighende sas modas europeas chi lompiant a inoghe pro mèdiu de modellos in pabiru e de sas rivistas de moda inglesas e frantzesas dae su de 17 sèculos. Bidimus duncas sas iconografias de sos primos de su 1800 (Cominotti, Tiole) chi nos ammustrant bestires feminiles de su Campidanu e de Casteddu cun capeddos tzilìndricos a pinnas de istrutzu e frores de seda, prus chi non caros, pro los pònnere in dies de importu che a sos isposòngios o a sas festas patronales. In custas pinturas sa casta de bestimenta est de tipu arcàicu, cun camisas sena ricamos o pitzos, sena mucadores a covecare su sinu, cun prendas tìpicas de su tempus sena lasu, bròscias e oraria borbònica (elementos chi ant a arribbare a pustis, in sa segunda metade de su 1800). Sa bestimenta traditzionale est una de sas caraterìsticas de sa bidda, comunicaiat su logu nadiu, su grupu sotziale, s’edade, su gènere, s’istadu tzivile e su ruolu de cada persone in intro de una comunidade. Custu cheret nàrrere chi b’aiat castas diferentes de bestimenta (cun variantes relativas): su bestire de gala, de mesu gala (pro sas dies nòdidas), su de cada die, su de traballu, su de su corrutu e de mesu corrutu. Gosi Valery in su suo “Viaggio in Sardegna” de su 1837: «Sas massajas sas prus distintas, sas printzipales fiant bestidas in manera prus rica e unas cantas aiant sos pòddighes càrrigos de aneddos. Custas ebbia aiant su privilègiu de mustrare unos cantos ricamos proibidos a sas cumpàngias issoro.