Prendas e
bestimentas
antigas

Prendas e bestimentas antigas Vol. I Nùgoro, Orgòsolo, Orune, Òsile e Ceràxius
Su laboratòriu previstu in su progetu Una limba in caminu, dedicadu a totu sos tzitadinos residentes in su Comunu de Nùgoro, at collidu una sèrie de notziones importantes e fundamentales subra de s’istòria, sa cultura e sas dinàmicas sotziales e econòmicas de su pòpulu sardu, gràtzias a s’istùdiu fungudu de sas bestimentas e de sas prendas traditzionale de Nùgoro, Orgòsolo, Orune, Òsile e Ceràxius.
Su laboratòriu at tentu comente tema sa Festa de su Redentore e sas biddas chi pro sèberu personale e pro fide leant parte dae 122 annos a s’eventu: sa festa nugoresa pro primore chi rapresentat, pro totu sa Sardigna, un’addòbiu de importu pro medas resones, non petzi pro s’ispiritualidade sua, ma fintzas a sa promotzione turìstica, culturale e sotziale de sa Tzitade.
Su Redentore rapresentat un’ocasione manna chi permitit siat de fàghere lòmpere dae sas marinas a sas zonas internas turistas e bisitadores meda, cun grandu profetu pro sas fainas produtivas, siat de afortigare su sentidu de apartenèntzia e identitàriu de sos tzitadinos e de sos emigrados.
Nùgoro at seberadu su Redentore comente sìmbulu suo, balente e bàndidu, promotore culturale e turìsticu, capatzu de veiculare s’imàgine sua siat in sa penìsula, siat in s’èsteru.
Sa professione pomposa de sos costùmenes antigos de sa Sardigna (3000 figurantes), cun prus de chentu fèminas in costùmene, e sos 300 cadderis e prus, paris cun su Fèstival Regionale de sas Traditziones Populares e sa tzelebratzione religiosa famada in su Monte Ortobene rapresentant un’apuntamentu chi, cada annu, cramat mìgias de bisitadores chi abarrant ispantados dae sos colores, dae sa mùsica e dae sa variedade de sos costùmenes.
S’imponèntzia e sa grandu variedade de su vestiàriu traditzionale sardu presentadu in ocasione de s’isfilada rapresentat un’unicum tra sos paisos chi s’incrarant in su Mediterràneu, sende chi sa Sardigna est s’ùnicu logu in ue, a pagu tretu dae una bidda a s’àtera, si podent ammirare bestimentas diversas siat pro su tràgiu, siat pro sa richesa de ricamos fatos dae sas manos espertas de mastros e mastras de pannu, a bortas abbellidos cun robas pregiadas bènnidas dae su nord de Itàlia o dae s’èsteru.
Su vestiàriu e sas prendas traditzionales, s’aunint e creant unu acàpiu acàpiu pro avalorare sos bestires e sas prendas de Nùgoro e de Orgòsolo, Orune, Òsile e Ceràxius semper presentes in sa Festa de su Redentore, promovende su connoschimentu de sos nùmenes de sas partes chi cumponent sas bestimentas in sa faeddada locale, sas tècnicas de traballadura e de ricamu, sos nùmenes de sas robas e sa provenièntzia issoro, sas dinàmicas sotziales e culturales.
Su progetu at prevìdidu s’imprenta e sa publicatzione in lìnia de unu primu volùmene e punnat a collire, pro sas annualidades imbenientes, sos datos chi pertocant sas bestimentas e a sas prendas traditzionales de totus sas àteras biddas chi costumant a leare parte a sa Festa de su Redentore.
Bona bisione e bona letura a totus.